Frankfurtek euskal ikasketei buruzko zikloak indartuko ditu

Frankurteko Goethe Unibertsitateak euskal gaiekin lotutako kultur eskaintza indartuko du datozen hilabeteetan. Azken urteotan bultzatu dituen euskara ikasketez gain, zinemari eta gai horiek Interneten eta hedabideetan duten eraginari buruzko ikastaro bana abiatuko ditu laster.

Bi ikastaro horiek Euskal Ikaskuntzen Alemaniako Etxeak antolatu ditu, unibertsitatearen babespean sortutako zentroa alegia. Zinemari buruzko zikloan euskal zuzendariek egindako edo Euskal Herrian filmatutako pelikulak aztertuko dituzte. "Benetan euskal zinemagintzarik ote dagoen argitu nahi genuke", azaldu du Martin Petrus zentroaren arduradunak. Besteak munduan barrena bizi diren euskal etorkinek Interneten duten presentzia izango du ardatz. "Nazioarteko hedabideek gai horiek nola jorratzen dituzten aztertu nahi dugu", gaineratu du ekimenaren bultzatzaileak.

Zinemagintzari buruzko zikloak 2004ko urtarrilean abiatu ziren Frankfurten. Geroztik, euskal zuzendariren batek edo euskal gaiekin zerikusia duen pelikula bat proiektatzen dute hileko bigarren asteazkenean. Ikasleek ez ezik, gai horietan interesa duten guztiek parte har dezakete proiekzioetan. Horrez gain, gaur egungo politikari, soziologiari eta euskal literaturari buruzko mintegiak prestatzen ari dira Euskal Ikaskuntzen Alemaniako Etxeko arduradunak.

Hiru urteko ibilbidea

Goethe Unibertsitateak 2003an jarri zituen martxan euskal kulturarekin lotutako ikasketa-progamak. Urte horretako udazkenean lehenbiziko euskara-ikastaroak ere antolatu zituzten, eta gerora Euskal Biblioteka osatuko zuten lehen liburuak jaso zituzten. Unibertsitatean euskal gaien inguruko interesa egon zitekeen argitu nahi zuten ekimenaren bultzatzaileek, etorkizunean euskal ikasketak bultzatzeko asmoarekin asmoarekin.

Ondoren, Eusko Jaurlaritzak eta Unibertsitateak lankidetza-hitzarmena izenpetu zuten, ikasketa horiek erakundearen eskaintza akademikoan txertatzeko helburuarekin. Westendeko campusean sortu zen Euskal Biblioteka izan zen akordio horren helburu nagusietako bat. Liburutegiak 1.200 liburu ditu gaur egun; horietako 400 elektronikoki sailkatuta daude eta ikasleek Internet bidez kontsulta ditzakete.

Hamar hizkuntzatan argitaratutako liburuak gordetzen dituzte liburutegian. Gaiei dagokienez, literatur-lanak daude, baita gai zientifikoei eta espezializatuei buruzko aleak ere, tartean hizkuntzalaritzari, politikari eta euskal kulturaren ingurukoak.

Hitzarmenak gai horiei buruzko alemanezko liburuak eta ikas-materialak sortzea du bigarren helburutzat, baita kongresuak, biltzarrak eta bestelako kultur-ekimenak bultzatzea ere. Ildo horretan, unibertsitatea Alemaniako zenbait argitaletxerekin harremanetan ari da, liburu horiek argitara eman ditzaten.