Gazteengan hausnarketa eragiteko xededun bilduma Ibaizabal argitaletxean

Beste hizkuntzatatik euskarara itzulitako lanek osatuko dute Ibaizabal argitaletxeak abenduan, Durangoko Azokaren inguruan abian jarritako bilduma berria, Ameslari titulupean.

Eukene Herrera, argitaletxeko literatura arduradunaren esanetan, urtero lau bat lan berri kaleratzea da euren asmoa, eta liburuak, batik bat, eskolatan banatuko direla azaldu du ere. Orain arte, hiru titulu eman dituzte argitara, Eguneroko lokatz-eremuan, Koadroko emakumearen bila eta Oroimenaren azala. Lehenengoa eta hirugarrena bilduma berri honen helburu nagusia izango denaren ildoan kokatzen dira bete-betean, gazteei zer pentsatu ematea, alegia.

Eguneroko lokatz-eremuan Balkanetako egungo egoerara hurbiltzen da bertara itzultzen den neskatxaren egunkaria medio. Oroimenaren azala, aldiz, Jordi Serra i Fabraren jatorrizko lanak, munduko biztanle askok bizi duten babesik eza eta esplotazioa azaltzen ditu mutiko afrikar baten gorabeheren bidez.

Bilduma berria 14 urtetik gorako gazteei zuzentzen zaie. "Nerabeengan kezkak, galderak piztu nahi ditugu. Horrek ez du esan nahi irakurketa pisu bat eskaintzen ari garenik, baina bai liburua bukatzerakoan, giza eskubideak, munduan dauden errealitate ezberdinen ezagutza eta hainbat gairen inguruko hausnarketa bat sortzea", dio Herrerak.

Lehen hiru hauen jarraian argitaratuko diren lanak oraindik erabaki gabe badaude ere, arduradunek argi dute hauxe izango dela mantenduko duten filosofia, entretenigarria izatea bai, baina aldi berean irakurketaren ondoren zer pentsatu ematea ere.