Edizio berrituak irakurle berrientzat

Egunero hasten delako, Arestiren ipuinak eta Haur besoetakoa aurretik ezagutzen zituzten irakurleek zenbait aldaketa suma ditzakete edizio berrietan. Argitaletxeek jatorrizko testuak gaur egungo moldeetara ekarri nahi izan dituzte, haietara lehen aldiz hurbiltzen direnak asebete nahian.

Moldaketarik sakonena Saizarbitoriak bere eleberriari egindakoa izan da. Hizkuntzari dagokionez egungo euskara batuaren irizpideetara moldatzeaz gain, zenbait pasarte berridatzi ditu, orain ia 40 urte sortutako haria errespetatuz. "Konpondu baino gutxiago kostatu zitzaidan berridaztea. Lehen laurdena zegoen eran utzi eta handik aurrera berridatzi egin dut, baina lehengo espiritua gordez. Esango nuke lehendik irakurria duen batek ez lukeela aldaketarik sumatuko", azaldu du.

Artzeren poesiei ere azken hamarkada hauetan haietan oinarriturik idatzi diren kantuak gehitu dizkiete argitalpenaren arduradunek. Miranderen eleberria, berriz, irakurle berrientzat irakurterrazagoa gertatuko den bertsioan, hizkuntzari dagokionez gaurkotuan nahiz eta Iparraldeko hizkeraren tonuari eutsi.

Antzeko ahalegina egin dute argitaratzaileek Arestiren kontakizun laburrekin. Estiloari dagokionez (plano aldaketen erabilera adibidez) bete-betean ipuingintza modernoaren parametroetan sartzen diren testuak hizkuntzari dagokionez gaurkotuak eman dituzte berriz argitara, literatura unibertsaleko klasiko nagusiekin egin den antzera. "Begirunez tratatu behar ditugu gure izar horiek, baina aldi berean, lan egin behar dugu beren ekoizpenek denbora pasatuta ere iraun dezaten", azaldu du editoreak.

Hala, idazlearen familiak berak ontzat jo duen bertsio berritua sortu dute, haren testuak irakurle gehiagorengana iritsi daitezen. "Nik nire burua lasaitu nuen zera esanez: Arestik hau irakurriko balu, ontzat joko luke", argudiatu du moldaketaren egileak.

Ahalegina ez bide da antzua izan, iragan urtarrilean argitaratu zenetik gehien saldutako euskarazko liburuen artean kokatu baita, lehenbiziko bi edizioak agortu ondoren.